I gcás nach féidir le páirtithe sibhialta aontú faoi conas a scarfaidh siad, is féidir le ceachtar acu iarratas a dhéanamh chuig na cúirteanna ar Fhoraithne Scaoilte. Cuireann an fhoraithne sin deireadh foirmiúil le páirtnéireacht shibhialta. Má chuirtear deireadh le páirtnéireacht shibhialta, is féidir leis tionchar a imirt ar roinnt de do chúinsí agus d'fhéadfadh sé a bheith casta.
B'fhéidir gur mhaith leat comhairle dlí a fháil chun tuiscint níos fearr a fháil ar a bhfuil i gceist.
An féidir liom deireadh a chur le mo pháirtnéireacht shibhialta?
Féadfaidh sé go mbeidh tú in ann iarratas a dhéanamh chun deireadh a chur le páirtnéireacht shibhialta má dhéanann na ráitis seo a leanas cur síos ar do chaidreamh:
- Tá sibh in bhur gcónaí ar leithligh óna chéile ar feadh tréimhse dhá bhliain as na trí bliana sula ndéantar an t-iarratas.
- Tá socruithe cuí déanta agaibh nó déanfaidh sibh socruithe cuí don bheirt pháirtí sibhialta agus d'aon leanaí cleithiúnacha araon.
Rudaí ar cheart smaoineamh fúthu
Agus ordú á dhéanamh ag breitheamh chun deireadh a chur le páirtnéireacht shibhialta, ní mór dó/di a chinntiú go ndéantar soláthar cuí duit féin, do do pháirtí sibhialta agus do do leanaí cleithiúnacha. Déanfaidh an breitheamh aon chomhaontuithe a dtagann tú orthu agus aon orduithe cúirte atá ann cheana féin a bhreithniú.
Agus deireadh á chur le páirtnéireacht shibhialta, b'fhéidir go mbeidh ort smaoineamh ar chomhaontú a bhaint amach maidir le roinnt nithe. Is iad seo a leanas na nithe is coitianta:
- Socrú a dhéanamh cónaí ar leithligh óna chéile
- Socruithe do leanaí
- Cothabháil
- Áras an teaghlaigh
- Airgead, sócmhainní agus pinsin
Conas iarratas a dhéanamh?
Tá an próiseas cúirte chun iarratas a dhéanamh ar dheireadh a chur le páirtnéireacht shibhialta cosúil le hiarratas a dhéanamh ar cholscaradh a dhéanamh. Chun treoir a fháil, tabhair cuairt ar leathanach um an bpróiseas colscartha. Beidh ort a chinntiú go bhfuil d'iarratas cúirte chun deireadh a chur le páirtnéireacht shibhialta ceart. B'fhéidir go mbeidh ort tagairt a dhéanamh do reachtaíocht agus rialacha na Cúirte Cuarda freisin.