Is féidir libh socruithe rochtana a chomhaontú do leanbh. Mura féidir libh teacht ar chomhaontú, féadfaidh sibh a iarraidh ar bhreitheamh sa chúirt cinneadh a dhéanamh maidir le socruithe rochtana.
Rochtain trí chomhaontú
I gcás ina n-aontaíonn na páirtithe, is féidir socruithe rochtana comhroinnte a chur i bhfeidhm don leanbh. Is féidir libh teacht ar chomhaontú faoi shocruithe rochtana le chéile sibh féin, nó le cabhair ó eadránaí nó aturnae. D'fhéadfadh comhoibriú maidir le socruithe praiticiúla ó lá go lá agus socruithe speisialta a bheith san áireamh in bhur gcomhaontú, mar shampla:
- bualadh leis an leanbh i bpearsa ar laethanta agus amanna comhaontaithe
- bualadh leis an leanbh i bpearsa le haghaidh imeacht sóisialta nó ócáid speisialta, amhail lá breithe
- cumarsáid a dhéanamh ar an nguthán nó trí mhodhanna leictreonacha eile
- an leanbh a bheith agat thar oíche ó am go chéile, ar gach dara deireadh seachtaine nó le linn laethanta saoire scoile
- ag dul ar laethanta saoire leis an leanbh
B'fhéidir gur mhaith leat a iarraidh ar bhreitheamh Riail Chúirte a dhéanamh de do chomhaontú. Ciallaíonn sé sin go gcaitear leis mar an gcéanna le hordú cúirte agus gur féidir é a fhorfheidhmiú go dlíthiúil cosúil le hordú cúirte. Is ionann iarratas a dhéanamh chun riail chúirte a dhéanamh de do chomhaontú agus iarratas a dhéanamh chun na cúirte ar ordú um rochtain. Tabhair cuairt ar ár rannán "Conas Iarratas a Dhéanamh" thíos chun tuilleadh eolais a fháil.
Tuilleadh eolais ar eadráin agus ar chúnamh dlí >Rochtain arna chinneadh ag an gcúirt
Mura féidir libh teacht ar chomhaontú, is féidir leat iarratas ar rochtain a dhéanamh chun na cúirte. Seo thíos samplaí de dhaoine ar féidir leo iarratas a dhéanamh chun na cúirte. Seans go mbeidh tú féin i gcás ceannann céanna nó i gcás comhchosúil. Ní liosta uileghabhálach é seo.
Déantar formhór na n-iarratas cúirte chuig an gCúirt Dúiche. Is féidir iad a dhéanamh leis an gCúirt Chuarda freisin, go minic mar chuid d'iarratas ar idirscaradh breithiúnach nó ar cholscaradh.
B'fhéidir gur mhaith leat comhairle dlí a fháil chun tuiscint níos fearr a fháil ar do chás ar leith.
Easaontaíonn tuismitheoirí maidir le socruithe rochtana
Sa chás nach féidir leis na tuismitheoirí teacht ar chomhaontú, is féidir leis an tuismitheoir nó caomhnóir neamhchónaitheach iarratas ar Ordú Rochtana a dhéanamh chun na cúirte. Is ordú é sin ó bhreitheamh ina leagtar amach conas a dhéanfar rochtain a eagrú. Féadfaidh an breitheamh tuairimí an linbh a mheas má mheastar go bhfuil aois agus leibhéal tuisceana an linbh oiriúnach.
Gaolta an linbh
Is féidir le deartháireacha, deirfiúracha, aintíní, uncailí, agus seantuismitheoirí iarratas ar rochtain a dhéanamh chun na cúirte. Áirítear leis seo iad siúd a bhfuil gaol acu leis an leanbh trí uchtáil. Baineann sé sin freisin le rochtain ar leanbh a d'fhéadfadh a bheith faoi chúram an Stáit.
Caomhnóirí
Is féidir le duine ar bith atá ina c(h)aomhnóir faoi láthair, lena n-áirítear caomhnóir sealadach, nach bhfuil rochtain aige/aici iarratas a dhéanamh chun na cúirte.
Daoine fásta eile
Is féidir le haon duine fásta eile a chónaíonn leis an leanbh, nó a chónaigh leis/léi roimhe seo, iarratas ar rochtain a dhéanamh chun na cúirte. Agus cinneadh á dhéanamh maidir le rochtain a dheonú, breithneoidh an breitheamh an méid seo a leanas:
- Caidreamh an iarratasóra leis an leanbh
- Aon bhaol go gcuirfí isteach ar shaol an linbh nó dá bhféadfadh an rochtain dochar a dhéanamh don leanbh
- mianta chaomhnóirí an linbh
- tuairimí an linbh
- an gá ordú a dhéanamh chun rochtain an duine ar an leanbh a éascú
Seiceáil an féidir leat iarratas a dhéanamh
Más mian leat a sheiceáil an bhfuil tú incháilithe chun iarratas a dhéanamh ar rochtain, is féidir leat ár n-uirlis thapa 'Seiceálaí Incháilitheachta' a úsáid thíos.
Seiceáil an féidir leat iarratas a dhéanamh
Trí shraith ceisteanna simplí a fhreagairt, beidh tú in ann a sheiceáil an bhfuil tú incháilithe chun iarratas a dhéanamh ar rochtain. Tá na torthaí bunaithe ar do chuid freagraí, ach is féidir le cásanna a bheith casta agus b'fhéidir gur mhaith leat comhairle dlí a fháil chun tuiscint níos fearr a fháil ar do chuid roghanna
Níl aon sonraí á dtaifeadadh ná á seoladh le linn an phróisis.