Má tá aon cheist agat faoi phas linbh nó faoi iarratas ar phas linbh, ba cheart duit teagmháil a dhéanamh ar dtús le hOifig na bPasanna de chuid na Roinne Gnóthaí Eachtracha.
Ní féidir leis an tSeirbhís Chúirteanna faisnéis a chur ar fáil ach amháin maidir le cásanna ina bhfuil baint ag cúirt le saincheist pas linbh. Is minic a bhaineann na saincheisteanna sin le cé a shíníonn don phas agus cé a thugann aire dó.
B'fhéidir gur mhaith leat comhairle dlí a fháil chun tuiscint níos fearr a fháil ar do chás ar leith.
Cén fáth ar cheart iarratas a dhéanamh chuig an gcúirt maidir le pas linbh?
Tá cásanna áirithe ann ina mbeidh ort cinneadh breithimh a fháil maidir le saincheist pas linbh. Áirítear leo siúd na cásanna seo a leanas:
- Diúltaíonn caomhnóir amháin síniú
Má tá beirt chaomhnóirí ann, ní mór don bheirt acu an fhoirm iarratais ar phas linbh a shíniú. Má dhiúltaíonn caomhnóir amháin an fhoirm iarratais a shíniú, is féidir leat iarratas a dhéanamh chun na cúirte chun pas an linbh a eisiúint gan a s(h)íniú.
- Ní féidir caomhnóir amháin a aimsiú
D'fhéadfadh sé nach féidir dul i dteagmháil le caomhnóir amháin. Sa chás seo, is féidir leat iarratas a dhéanamh chun na cúirte chun pas an linbh a eisiúint gan a s(h)íniú.
- Rochtain a fháil ar phas linbh
Féadfaidh cúirt coinníollacha a chur i bhfeidhm maidir leis an áit a bhfuil pas an linbh á choinneáil. Mar shampla, d'fhéadfadh an chúirt an pas a choinneáil. D'fhéadfadh duine ainmnithe arna cheapadh ag an gcúirt é a choinneáil freisin agus é a scaoileadh saor faoi choinníollacha áirithe. Sa chás seo, beidh ar chaomhnóir iarratas a dhéanamh chun na cúirte chun an pas a scaoileadh. Déanfaidh an chúirt leas an linbh a bhreithniú i gcónaí.