Fógra Foriarratais
Is éard is Fógra Foriarratais ann ná iarratas i scríbhinn chun na cúirte. Úsáidtear é chun treoracha nó cinntí a bhaineann le cás a iarraidh ar Chláraitheoir Contae nó ar bhreitheamh. D'fhéadfadh ábhair mar seo a leanas a bheith san áireamh ann:
- doiciméid a sheirbheáil
- am breise a iarraidh chun freagra a thabhairt
- éisteachtaí cúirte a eagrú
- orduithe a iarraidh
Seo iad na céimeanna atá le leanúint:
1. Fógra Foriarratais a Chomhlánú
I d'fhógra, beidh ort an méid atá á iarraidh ar an gcúirt agat treoracha nó cinntí a dhéanamh ina leith a lua. Má tá aturnae agat, déanfaidh sé/sí é sin duit.
Athraíonn an próiseas chun Fógra Foriarratais le dáta cúirte a leithdháileadh de réir suímh. Déan teagmháil le d'oifig chúirte áitiúil chun eolas a fháil ar an bpróiseas atá i bhfeidhm sa chúirt sin sula seirbheálann tú ar an bpáirtí eile.
Cliceáil anseo le haghaidh sonraí teagmhála na n-oifigí cúirte go léir >
2. Mionnscríbhinn Forais
Leagtar amach i Mionnscríbhinn Forais na fíricí agus na doiciméid ábhartha atá le breithniú ag an gcúirt. Caithfidh tú a mhionnú gur fíor fíricí na mionnscríbhinne. Ní mór é sin a dhéanamh i bpearsa le haturnae (ach ní le d'aturnae féin) nó le Coimisinéir Mionnaí. Ní mór an mhionnscríbhinn sin a chomhlánú leis an bhFógra Foriarratais.
3. An Fógra Foriarratais a sheirbheáil agus a chomhdú in oifig na cúirte mar aon le doiciméid tacaíochta
Ní mór duit cóip den Fhógra Foriarratais agus den mhionnscríbhinn forais a sheirbheáil ar an bpáirtí eile. Ba chóir duit cóip de na doiciméid go léir a choinneáil do do thaifid féin. Tar éis duit iad a sheirbheáil, ní mór duit na doiciméid seo a leanas a chomhdú in oifig na cúirte:
- Fógra Foriarratais bunaidh
- mionnscríbhinn forais bhunaidh; agus
- cruthúnas ar sheirbheáil ar an bpáirtí eile
Má tá na doiciméid in ord, liostófar an Fógra Foriarratais don chúirt.
Tuilleadh eolais maidir le doiciméid dhlíthiúla a sheirbheáil agus cruthúnas ar sheirbheáil >