Céim 5 - Ag ullmhú do do choinne
Maidir leis an gcoinne
Nuair a bheidh d’fhoirm iarratais chomhlánaithe curtha isteach agat in éineacht leis na doiciméid riachtanacha (féach Céim 3 - An fhoirm iarratais phearsanta) - agus ar choinníoll go bhfuil gach rud in ord leis an méid a chuir tú isteach, déanfaimid coinne a sceidealú leat chun d’iarratas a chríochnú.
Is le hoifigeach probháide a dhéanfar an coinne agus is go pearsanta san oifig atá ag déileáil le d’iarratas a dhéanfar é. Deimhneoimid sonraí an choinne roimh ré tríd an bpost nó ríomhphost.
Cad is gá duit a thabhairt leat
Chun a chinntiú go n-imíonn do choinne go réidh agus chun an dara cuairt a sheachaint, ní mór duit na míreanna seo a leanas (má bhaineann) a thabhairt leat chuig do choinne:
- An uacht bhunaidh agus an chodaisíl (más ann di): Cinntigh go dtabharfaidh tú an uacht bhunaidh agus ní cóip di leat. Le linn do choinne caithfidh an t-oifigeach probháide an doiciméad bunaidh a fheiceáil lena fhíorú, cé gur cuireadh fótachóip isteach le d’iarratas. Cuidíonn sé seo leis an mbaol, go gcaillfear nó go ndéanfar dochar don uacht bhunaidh sa phost, a sheachaint. B’fhéidir go mbeidh ort dul i dteagmháil leis an aturnae a d’ullmhaigh an uacht chun an bhunchóip a fháil.
- Aitheantas Fótagrafach: Áirítear le foirmeacha aitheantais inghlactha ceadúnas tiomána nó pas.
- Modh íocaíochta: Tabhair leat cárta creidmheasa nó dochair chun an táille a íoc. Má tá iarratas á dhéanamh agat ar Chlárlann Phrobháide Dúiche, seiceáil le do thoil leis an oifig ábhartha roimh ré maidir le modhanna íocaíochta a nglactar leo.
- Doiciméid bhreise: Tabhair leat aon doiciméid eile a d’iarr an Oifig Phrobháide.
Mura dtabharfaidh tú aitheantas fótagrafach nó an uacht bhunaidh leat, ní bheimid in ann dul ar aghaidh leis an gcoinne mar a bhí beartaithe, agus beidh ort coinne eile a sceidealú.