Cosaint agus Frithéileamh
Chun cur in aghaidh colscartha, beidh ort foirm Cosanta a chomhlánú. Beidh ort foirm Mionnscríbhinne Acmhainne a chomhlánú freisin. Má tá leanaí cleithiúnacha ann, beidh ort foirm Mionnscríbhinne Leasa a chomhlánú freisin. Tá an t-eolas is gá duit a chur san áireamh leagtha amach i rialacha na Cúirte Cuarda. B'fhéidir gur mhaith leat comhairle dlí a fháil chun tuiscint níos fearr a fháil ar a bhfuil i gceist.
Cosaint (Foirm 6A)
Agus do chosaint á comhlánú agat, b'fhéidir gur mhaith leat freagra a thabhairt ar aon cheann de na rudaí a mhaítear sa bhille sibhialta nó easaontú leo. B'fhéidir gur mhaith leat freisin iarratais bhreise a chur isteach ar orduithe ar mhaith leat go ndéanfadh an chúirt iad chomh maith leis an alt/na hailt den Acht Colscartha a ligeann don chúirt na horduithe sin a dhéanamh. Tugtar frithéileamh air sin.
Mionnscríbhinn Acmhainne (Foirm 37A)
Is ráiteas é sin ina leagtar amach do chúinsí airgeadais féin. Leagfaidh do chéile ráiteas airgeadais ar leith amach. Ní mór duit gach mionnscríbhinn a shíniú i bpearsa os comhair aturnae (ach ní os comhair d'aturnae féin) nó os comhair an Choimisinéara Mionnaí agus a mhionnú go bhfuil an t-eolas atá á thabhairt agat ceart.
I measc an t-eolas a bheidh ort a chur san áireamh sa mhionnscríbhinn sin tá:
- Do shócmhainní, amhail réadmhaoin, gluaisteáin, áras an teaghlaigh, scaireanna agus talamh a d'fhéadfadh a bheith agat.
- D'ioncam, lena n-áirítear do phá nó tuarastal, ioncam cíosa agus díbhinní scaireanna.
- Do chaiteachas ar chóiríocht, oideachas, earraí grósaera, fóntais, cúram sláinte, fiaclóireacht, mótar, iompar poiblí, siamsaíocht agus árachas.
- Fiacha agus/nó dliteanais, amhail aisíocaíochtaí iasachta agus morgáistí.
- Teidlíochtaí pinsin.
Ní liosta uileghabhálach é sin, mar sin ba chóir duit tagairt a dhéanamh i gcónaí do rialacha na Cúirte Cuarda.
Do mhionnscríbhinn a mhionnú
Ní mór duit an mhionnscríbhinn chomhlánaithe, foilseáin ar bith (doiciméid tacaíochta) agus cruthúnas ar d'aitheantas a thabhairt do Choimisinéir Mionnaí nó d'aturnae (ach ní d'aturnae féin). D'fhéadfadh táille a bheith i gceist don tseirbhís seo, mar sin déan cinnte ceist a chur roimh ré.
Iarrfaidh Coimisinéir Mionnaí nó aturnae ort mionn nó dearbhascadh a ghlacadh sula síneoidh tú an mhionnscríbhinn. Ní féidir leat aon athruithe a dhéanamh ar an mionnscríbhinn a luaithe a bheidh sí faoi mhionn agus sínithe.
Mionnscríbhinn Leasa (Foirm 37B)
Is éard is Mionnscríbhinn Leasa ann ná ráiteas faoi mhionn a bhaineann le leanaí cleithiúnacha den phósadh. Mura bhfuil aon leanaí cleithiúnacha ann, ní gá duit tabhairt faoin gcéim sin.
Meastar gur leanbh cleithiúnach é aon leanbh:
- atá faoi bhun 18 mbliana d'aois
- atá os cionn 18 mbliana d'aois ach faoi bhun 23 bliana d'aois agus in oideachas lánaimseartha
- a bhfuil míchumas meabhrach nó coirp air/uirthi agus nach féidir leis/léi aire iomlán a thabhairt dó/di féin
Seo a leanas an cineál eolais a bheidh ort a chur san áireamh:
- Ainmneacha agus dátaí breithe aon leanaí.
- Sonraí faoin áit a bhfuil na leanaí ina gcónaí agus cur síos ar an chóiríocht.
- Sonraí faoi oideachas na leanaí.
- Sonraí faoi shocruithe cúraim na leanaí.
- Sonraí faoi aon íocaíochtaí cothabhála atá á ndéanamh.
- Sonraí faoi theagmháil leis na leanaí.
- Sonraí faoi shláinte na leanaí agus sláinte na dtuismitheoirí.