Cad is orduithe um fhoréigean baile ann?
Is cosaintí cúirte iad orduithe um fhoréigean baile. Déanann breitheamh iad agus tagann siad le horduithe nó treoracha sonracha. Tugann cuid acu ordú do dhuine a bhfuil iompar drochídeach curtha ina leith stop a chur le tuilleadh gníomhartha nó bagairtí d'iompar foréigneach a dhéanamh. Ordaíonn orduithe eile don duine sin imeacht - agus fanacht amach - uaitse agus ó do leanaí cleithiúnacha (más infheidhme) agus ón teach. Beidh ort a mhíniú don bhreitheamh sa chúirt cén fáth a bhfuil ordú ar leith á iarraidh agat.
Más tusa an duine a bhfuil ordú á iarraidh agat chun tú a chosaint ar ghníomhartha nó ar bhagairtí foréigin baile, tugtar an t-iarratasóir ort. Tugtar an freagróir ar an duine a bhfuil tú ag iarraidh ar an gcúirt ordú a dhéanamh ina c(h)oinne.
Déantar formhór na n-iarratas ar orduithe um fhoréigean baile sa Chúirt Dúiche. Déantar cuid acu sa Chúirt Chuarda nó san Ard-Chúirt, áfach. Is minic a bhíonn siad sin mar chuid de chásanna eile amhail colscarthaí nó idirscarthaí breithiúnacha.
Conas a bhaineann orduithe cúirte lena chéile
Tá teorainn ama ar leith ag gach ordú cúirte chun cabhrú tú féin agus do leanaí (más infheidhme) a chosaint ó iompar drochídeach. Cuimhnigh freisin nach féidir le breitheamh ach an t-ordú cúirte sonrach a ndéanann tú iarratas air a dhéanamh. B'fhéidir gur mhaith leat an t-eolas faoi na cineálacha éagsúla orduithe a léamh chun a chinntiú go ndéanann tú iarratas ar na horduithe a oireann do do chás.
Is féidir leis an mbreitheamh orduithe a dhéanamh a chuireann do shábháilteacht fhadtéarmach san áireamh. Is Ordú Urchoisc nó Ordú Sábháilteachta iad sin. Féadfaidh siad sin a bheith i bhfeidhm ar feadh roinnt blianta.
Is féidir leis an gcúirt orduithe a dhéanamh freisin a chuireann do shábháilteacht láithreach nó ghearrthéarmach san áireamh. Is Ordú Cosanta, Ordú Urchoisc Eatramhach agus Ordú Urchoisc Éigeandála iad sin.
Más mian leat iarratas a dhéanamh ar Ordú Cosanta, ní mór duit iarratas a dhéanamh ar Ordú Urchoisc nó ar Ordú Sábháilteachta, nó ar an dá cheann. Más mian leat iarratas a dhéanamh ar Ordú Urchoisc Eatramhach, ní mór duit iarratas a dhéanamh ar Ordú Urchoisc, nó ar Ordú Urchoisc agus ar Ordú Sábháilteachta.
Tugann gach ordú cúirte aghaidh freisin ar iompar foréigneach ar leith. Mar shampla:
- Is féidir leo ordú a thabhairt do dhuine stop a chur le tuilleadh gníomhartha nó bagairtí foréigneacha a dhéanamh. Chun é sin a dhéanamh, is féidir leat iarratas a dhéanamh ar Ordú Sábháilteachta fadtéarmach nó ar Ordú Cosanta láithreach.
- Is féidir leis na horduithe sin ordú a thabhairt do dhuine an teach a fhágáil. Chun é sin a dhéanamh, is féidir leat iarratas a dhéanamh ar Ordú Urchoisc fadtéarmach nó ar Ordú Urchoisc Eatramhach láithreach.
- Is féidir leis na horduithe sin ordú a thabhairt do dhuine an teach a fhágáil sa chás go bhfuil níos lú cearta maoine agat sa teach. Chun é sin a dhéanamh, is féidir leat iarratas a dhéanamh ar Ordú Urchoisc Éigeandála láithreach.
Is féidir leat níos mó a fhoghlaim faoi na horduithe éagsúla atá ar fáil thíos: